Ақтөбе көлік, байланыс және жаңа технологиялар колледжі қалалық №22, №33 орта мектептердің оқушыларына “Қазақстан темір жолы ҰК” АҚ Ақтөбе электрмен жабдықтау дистанциясының Ақтөбе магистральдық желі бөлімшесі филиалына экскурсия ұйымдастырды. Шара барысында қатысушылар теміржол саласының кәсіптері туралы толық мағлұмат алып, филиалдың материалдық-техникалық базасымен танысты. Сонымен бірге филиал мамандары заманауи инфрақұрылым, техникалық жарақтандыру және теміржолдағы қауіпсіздік туралы бейнероликтерді көрсетті. Бұл материалдар оқушыларға теміржол саласының қалай дамып жатқандығын, қызмет көрсету сапасы мен қауіпсіздігін арттыру үшін қандай инновациялар енгізілуде екендігін түсінуге мүмкіндік береді. Филиал басшысы С.А.Орынбаев өзінің кәсіби тәжірибесімен бөлісіп, теміржол саласына байланысты мамандықтардың артықшылықтары мен ерекшеліктері туралы түсіндірді. Колледж директорының оқу-өндірістік ісі жөніндегі орынбасары А.С.Бөрібаев білім беру бағдарламалары, ҚТЖ филиалдарымен ынтымақтастығы туралы айтып, оқу орны түлектерін ҚТЖ кәсіпорындарында практикалық даярлау мен жұмысқа орналастырудың маңыздылығын атап өтті. Шара соңында мектеп оқушыларына мамандықтар, білім беру бағдарламалары және колледж байланыс деректері туралы ақпараттық материалдар табыс етілді.
